١- مفيش أي شاشة قبل عمر السنتين.
٢- لو طفلك متكلمش عند عمر السنتين..يبقى ممنوع الشاشات خالص لحد ما يبدأ يتكلم و تكون لمدة لا تزيد عن نصف ساعة.
٣- ممنوع تعودي طفلك يندهلك أو ينده باباه بأسمائكوا.
٤- اللعثمة ميتسكتش عليها نهائي. لازم تستشيري مختص.
٥- متخضيش ولادك. وتقولي بلعب معاهم. ولا تسمحي لولادك يخضوا بعضهم ويقولوا بنلعب.
٦-إهدي. إهدي . والأب اللي واقف هناك..إهدى لو سمحت. ثباتكوا الانفعالي أساس نجاح تربيتكوا لولادكوا.
٧- الضرب مش عقاب.اعرفوا ده كويس جدا.
٨-كل ما صوتك علي وزاد ..كل ما هيبتك كأم قل.
٩- الرياضة أساسية مش اختيارية.
١٠- الرياضة زي الملابس. لازم تبقى مقاس الطفل النفسي. مينفعش طفل قليل التفاعل الاجتماعي يلعب رياضة فردية. ولا طفل عنده فرط حركة يلعب لعبة بتزود الثبات الانفعالي مثلا. الرياضة بوجه عام رائعة. لكن كل نوع رياضة له السمة المميزة في الشخصية اللي بتشتغل عليه.
١١- قمة الرياضات المفيدة لسحب الطاقة رياضات المضرب.والسباحة. قمة الرياضات التي تساعد على الثبات الانفعالي رياضات الدفاع عن النفس. قمة الرياضات التي تساعد على التركيز والالتزام الجمباز.
١٢- اقفلي شاشاتك.
١٣- قنوات طيور الجنة وما شابهها من القنوات. كارثة تربوية تؤثر سلبا على الطفل لغويا ومهاريا.
١٤- العدل بين الإخوات فرض إنساني وديني. رجاء ابنوا بين الأخوة كنز من المحبة عن طريق عدم التمييز بينهم.
١٥- كل طفل له مدخل محدد ومميز في الاستيعاب والدراسة. فلا تعتمدي على نفس الطرق القديمة لحضرتك أو لإخواته الأكبر منه.
١٦- كل طفل له شخصيته وسماته النفسية وجيناته الوراثية المختلفة عن غيره. فرجاء حار عدم مقارتة الإخوة بعضهم ببعض. تحت دعوى ( مهو نفس الأب والأم والبيت ! ليه هو كده و اخواته كده !!) أكبر غلط المقارنة بين الإخوة.
١٧- ولاد الغربة لازم يتكلموا كتير مع أهاليهم في بلدهم الأصلي في أي مكان وبأي طريقة.
١٨- ولاد الغربة لما يرجعوا أجازة يقضوا أكبر وقت ممكن مع أهاليهم وأصحابهم وجيرانهم.
١٩- الطفل الأول من حقه يتدلع. مش لمجرد ما وصل الضيف الجديد ننسى حقوقه ونحمله مسئولية فوق سنه.
٢٠- متطلبوش من أولادكوا يحكوا تفاصيل زيارة بيت فلان أو علان. كده غلط.
٢١- متهنوش ولادكوا. العقاب مش شتيمة ولا ضرب.
٢٢- ممنوع ولادكوا يناموا معاكوا في نفس الأوضة. ممنوع منعا تاما.
٢٣- مينفعش تحرجي طفلك قصاد أي حد. استني لما تروحي بيتك واتناقشي معاه في اللي معجبكيش من سلوكه. وعاقبيه إن لزم الأمر. لكن متحرجيهوش قصاد الناس.
٢٤- نظمي لعب ولادك مع بعض. بقواعد عامة خاصة بالسلوك والتوقيت. زي مثلا كل واحد منهم له وقت معين للعبة كذا. أو ممنوع صوت عالي أو خبط وترزيع أثناء اللعب. القواعد والتنظيم بيوفر مجهود كبير جدا وبيقلل الأخطاء .
٢٥- اعرفي إن طفلك كائن حي مش كمبيوتر. يعني بيحس وبيغلط . مفيش داعي للهلع اللي بيصيب بعض الأمهات في حال اكتشافهم لأخطاء معينة من أطفالهم. اتعاملي بالراحة وبثبات انفعالي.
٢٦- النقد المستمر بيخلق شخصية مهزوزة وخايفة طول الوقت. النقد المستمر بيقتل الإبداع.
٢٧- حدوتة كل يوم اللي اختفت تقريبا من البيوت لها أثر نفسي وتربوي ولغوي وسلوكي كبير جدا جدا جدا. رجعوا الحدوتة. يمكن تلاقوا طفولتكوا معاها.
٢٨- التوعية ضد التحرش الجنسي ضرورة ملحة .
٢٩- مش كل طفل اتحرك شويتين واتشاقى حبتين. يبقى عنده فرط حركة. و مش كل طفل اتأخر حبة في الكلام أو عمل حركة معينة بشكل متكرر يبقى توحد. ارحمونا من الفتي يرحمكم الله.
٣٠-اهتمي بمظهر أطفالك. لأنهم لما يكبروا هيحاسبوكي عن ده. ولا سيما لو كنت وآخده بالك من مظهرك كأم .
٣١-اهتموا بمتابعة اختيارات أطفالكم على التلفزيون والموبايل. اعرفوا هم بيتفرجوا على إيه وانقذوا ما يمكن إنقاذه لو في خطأ.
٣٢- احضنوا ولادكوا. احضنوهم كتير وقولوا لهم إنكوا بتحبوهم.
٣٤- لو طفلك وصل لسنتين دون محاولة للكلام ولو حتى أنصاف كلمات و اتقال لك مسيره يتكلم لوحده.متسمعش الكلام. و إلجأ لمختص واتناقش معاه في سبب التأخر
٣٥- محبكش الخناق قصاد العيال على فكرة.محبكش خالص يعني.
٣٦- متخليش طفلك يتفرج على أفلام رعب بحجة إنك بتجمد قلبه. لا يا فندم. حضرتك بتخليه جبان وخواف.
٣٧- بلاش دراسة في فترة الصيف. كفاية إرهاق شهور الدراسة رجاء.
٣٨-متقوليش لطفلك الذكر. ( الولد مبيعيطش / الولد مبيلعبش بعروسة / الولد مبيخافش ) لإن ده أكبر غلط.
٣٩- مش لازم كل حرف غير واضح في كلام طفلك يبقى بالضرورة لدغة. ممكن يبقى محتاج تصحيح بسيط فقط لمخرج الحرف.
٤٠- تربية حيوان أليف في البيت -لو طاقة الأم تسمح – مفيد جدا نفسيا للطفل.